Joan den maiatzaren 16ko bileraren ondoren, Kataluniako Editoreen Elkarteak txosten bat argitaratu du. Txosten horretan, hezkuntzaren arloan liburuak (paperezkoak zein digitalak) erabiltzearen garrantzia aztertzen da, baita liburuek ikasleen errendimenduan zer-nolako eragina duten ere. Txostena, halaber, PISA 2022ko datuetan oinarritu da. Hona hemen txostenari dagokion infografia (katalanez). Jarraian, txostenean jasotako zenbait ideia aurkeztuko ditugu.
Liburuek ikaskuntza-prozesuan duten eragina
- Etxean paperezko liburuak dituzten ikasleek emaitza hobeak lortzen dituzte irakurritakoaren ulermenean, matematikan eta zientzietan.
- Azken hamarkadetan, murriztu egin da etxebizitzetan dagoen liburu-kopurua. Horrek diru-sarrera txikiko familiei eragiten die batez ere.
- PISAren arabera, <<inprimitutako materialak eskura dituzten ikasleek maila altuagoa izaten dute irakurritakoaren ulermenean>>.
- Inprimatutako liburuak erabiltzeak ulermena eta kontzentrazioa sustatzen ditu; baliabide digitalek, aldiz, irisgarritasun eta ikaskuntza-pertsonalizazio handiagoa ahalbidetzen dute.
Teknologia eta hezkuntza
- Gailu teknologikoak erabiltzeak ez du errendimendu akademikoa hobetzen; horien erabilera pedagogikoa da gakoa.
- Gailu teknologikoak gehiegi erabiltzeak distrakzioa eragiten du, eta matematikan izan dezake eragina.
- Inprimatutako materialak eta material digitalak modu orekatuan erabiltzea da emaitza onak lortzeko modua.
Desparekotasun sozioekonomikoak eta baliabide digitalak
- Etxean liburu asko dituzten familietako ikasleek lortzen dituzte emaitzarik onenak.
- Baliabide gutxiko eskoletan irakurmena sustatzeko materialik ez izateak desparekotasunak eragiten ditu.
- Hezkuntza-zentro pribatuek baliabide gehiago dituzte publikoek baino; horrek errendimendu akademikoan eragiten du.
Irakasleen eta familien formakuntza
- Irakasleen eta gurasoen formakuntza ezinbestekoa da, baliabide digitalak modu eraginkorrean uztartzeko eta irakurmena sustatzeko.
- Gurasoek irakurtzeko ohitura izateak eragin positiboa du seme-alaben irakurtzeko ohituretan.
Ondorioak
Liburuak eskura izatearen garrantzia
- Inprimatutako liburuak eta liburu digitalak eskura izatea ezinbestekoa da errendimendu akademikoa hobetzeko eta desparekotasunak murrizteko.
- Garrantzitsua da eskoletan liburutegiak egotea, material egokiekin hornituta eta ikasle guztientzat pentsatuta.
Teknologia modu orekatuan erabiltzea
- Baliabide digitalak inprimatutako liburuen osagarri izan behar dira; ez dituzte inolaz ere horiek ordeztu behar.
- Distrakzio digitalak matematika ikasteko prozesuan eragiten du. Hori dela eta, ezinbestekoa da haren eragina murrizteko estrategiak ezartzea.
Hezkuntza-baliabideak eskuratzeko zailtasunak
- Baliabide txikiko familietako ikasleek ez dituzte liburuak eta gailu elektronikoak eskura izaten; horrek haien errendimenduan eragiten du.
- Hezkuntza-politikek ikasle guztiek maila altuko materialak erabiliko dituztela bermatu behar dute.
Hezkuntza-politika jasangarriak izatearen garrantzia
- Beharrezkoa da irakasleentzako eta familientzako formakuntza-programak antolatzea, baliabide digitalak hobeto erabiltzen ikas dezaten.
- Hezkuntza-sistemek haurtzarotik sustatu behar dute irakurmena, irakurritakoaren ulermena hobetzeko eta desparekotasuna murrizteko.
